වේදනාකාරී ගැස්ට්‍රයිටිස් සුවකරන මෙම ආහාර ගැන ඔබ දැනුවත්ද?

වයස් භේදයක් නැතුව අද බොහෝදෙනෙකුට ප්‍රශ්නයක් වෙලා තියෙන රෝගී තත්වයක් තමයි ගැස්ට්‍රයිටිස් කියන්නෙ. දවසේ ඕනම වෙලාවක ගැස්ට්‍රයිටිස් නිසා ඇතිවන උදර වේදනාව නිසා බොහෝදෙනෙක් පීඩා විඳිනවා ඔබ දැක ඇති. ගැස්ට්‍රයිටිස් එහෙමත් නැත්නම් ආමාශ ප්‍රදාහය කියන්නෙ ආමාශයේ ඇතුළු ආස්තර බිත්තියෙ ඇතිවන ප්‍රදාහ එහෙමත් නැත්නම් දැවිල්ල තත්වය. මේ ඇතුළු බිත්තිය තමයි ආමාශයේදී ආහාර ජීර්ණයට අවශ්‍ය වන එන්සයිම හා අම්ල නිශ්පාදනය කරන්නෙ. මෙම රෝග තත්ත්වය නිසා එම ක්‍රියාවලි අඩාල වෙන්නත් පුළුවන්.

අද ගොඩ දෙනෙක් කාර්යබහුල ජීවිතයකට හුරුවෙලා තියෙන නිසාම තමන්ගේ ආහාර වේල ලබාගන්න එක ගැනවත් අවධානය දෙන්න බැරිවෙලා තියෙනවා. ඒ නිසාම මේ වේදනාකාරී රෝගයේ ගොදුරු බවට පත්වෙන්න වෙලා තියෙන එක ඉතාම කණගාටුදායක තත්වයක්. මුල් අවස්ථාවේදීම ගැස්ට්‍රයිටිස් ලක්ෂණ හදුනාගෙන ඉතාම ලේසියෙන් ඒවා පාලනය කරගන්න අනුගමනය කරන්න පුළුවන් විදිහ තමයි සුදුසු ආහාර භාවිතය. ඔබට ලේසියෙන්ම සපයාගන්න පුළුවන් ආහාර වලින් කොහොමද මේ වේදනාකාරී ගැස්ට්‍රයිටිස් පාලනය කරගන්නේ කියලා අපි හොයලා බලමු.

කෝමාරිකා

කෝමාරිකා කියන්නෙ කාටත් හරිම ලේසියෙන් හොයාගන්න පුළුවන් දෙයක්. ගැස්ට්‍රයිටිස් තත්ත්වයන්  පාලනය කරගන්න ගෙදරදීම ගන්න පුළුවන් දෙයක් තමයි මේ කෝමාරිකා. වතුර වීදුරුවකට කෝමාරිකා තේ හැඳි 2ක් පමණ එකතු කර හොදින් මිශ්‍ර කර පානය කිරීමෙන් ගැස්ට්‍රයිටිස් තත්ත්වයන් පාලනය කරගන්න පුළුවන්. දවසට දෙවතාවක් පානය කිරීමෙන් වඩාත් හොඳ ප්‍රතිඵල ලබාගන්න හැකියාව තියෙනවා. ආමාශයේ පවතින දැවිල්ල සමනය කරන්න හැකියාව කෝමාරිකාවලට තියෙනවා. ඒ වගේම කෝමාරිකාවල තියෙන විශබීජනාශක ගුණය නිසාම බැක්ටීරියා හා වෛරස වැනි ආසාදනවලින් ආමාශ ආස්තරණය ආරක්ෂා කර ගැස්ට්‍රයිටිස් තත්වය පාලනය කරන්නත් පුළුවන් වනවා.

බේකින් සෝඩා

බේකරි නිෂ්පාදනවලදී පිපුම්කාරකයක් එහෙමත් නැත්නම් leavening agent එකක් විදිහට භාවිතා කරන බේකින් සෝඩාත් ආමාශයේ දැවිල්ල සමනය කරන්න යොදාගන්න පුළුවන් හොඳ විසඳුමක්. බේකින් සෝඩා තේ හැන්දක වගේ ප්‍රමාණයක් වතුර වීදුරුවක හොදින් දියකර පානයෙන් බඩේ ඇතිවන දැවිල්ල සමනය කරගන්න පුළුවන්.  බේකින් සෝඩා සමන්විත වෙන්නේ සෝඩියම් බයිකාබනේට් කියන සංයෝගයෙන්. එහි තියෙන ප්‍රති ආම්ලික ගුණය නිසාම ආමාශයේ ආම්ලික බව අඩු කර ගැස්ට්‍රයිටිස් පාලනයට බේකින් සෝඩා යොදාගන්න පුළුවන්.

පොල් වතුර  

හැමදාම අපිට ගෙදරදී ලේසියෙන්ම හොයාගන්න පුළුවන් ඒවගේම ගොඩක් අපතේ දමන  දෙයක් තමයි පොල් වතුර. පොල් වතුරවල කොතරම් සෞඛ්‍යමය වටිනාකමක් තියෙනවාද කියලා ඔබ දැනුවත් වෙලා හිටියද? පොල් වතුරවල අඩංගු වෙන විශේෂිත අයණ වර්ග නිසාම හොඳ ශක්තිජනක පානයක් විදිහට භාවිතා කරන්න පුළුවන්. ඒ වගේම දිනකට 3 වරක් පමණ ආහාර වේල් දෙකක් අතර කාලයේදී පොල් වතුර පානය කිරීමෙන් ගැස්ට්‍රයිටිස් පාලනය කරන්නත් හැකියාවක් තියෙනවා. පොල් වතුරවල ප්‍රතිප්‍රදාහ ගුණය හේතුවෙන් ආමාශ බිත්තියේ ඇතිවන දැවිල්ල තත්ත්වයන් සමනය කරන්නත් පුළුවන් වෙනවා.

Green Tea

සෞඛ්‍ය සම්පන්නව ඉන්න ඇල්මක් දක්වන කවුරුත් Green Tea පානය කරන්නෙ දෙපාරක් හිතන්නෙ නැතුව. දියවැඩියා තත්ත්වය පාලනය කරගන්න ඒ වගේම සිරුරේ හැඩය පවත්වා ගෙන ලස්සනට ඉන්නත් green tea උදව් වෙනවා. දවසට දෙවරක් Green Tea පානය කිරීමෙන් ගැස්ට්‍රයිටිස් පාලනය කරගන්න පුළුවන්. Green Tea වල තියෙන ප්‍රතිඔක්සිකාරක සංයෝගවලට පුළුවන් ආමාශ බිත්තියේ ප්‍රදාහ තත්ත්වයන් සමනය කරන්න වගේම ගැස්ට්‍රයිටිස් රෝග ලක්ෂණ ඇතිවීම වලක්වන්නත්. වඩාත් හොඳ ප්‍රතිඵල ලබාගන්න මී පැණි ස්වල්පයක් එකතු කරගන්න අමතක කරන්නත් එපා. .

යෝගට්

Source – The Splendid Table

ගැස්ට්‍රයිටිස් වැඩි වුණාම ගොඩ දෙනෙක් යෝගට් එකක් කාලා ඒ තත්වය පාලනය කරගන්න පුරුදු වෙලා ඉන්නවා. යෝගට්වල තියෙන probiotic වලින් ආමාශ බිත්තියෙ ඇතිවෙලා තියෙන තුවාල සුවවීම වේගවත් කරනවා. ඒවගේම බැක්ටීරියා හා වෛරස ආසාදනයන්ගෙන් ඇතිවන ගැස්ට්‍රයිටිස් වලක්වන්නත් යෝගට් වලට පුළුවන්. වඩාත් කාර්යක්ෂම විදිහට ගැස්ට්‍රයිටිස් පාලනය කරගන්න යෝගට් සමග කහ ආහාරයට එකතු කරගන්න පුළුවන්. කහවල තියෙන Curcumin ආමාශයේ දැවිල්ල සමනය කරන්නත් ආසාදන තත්ත්වයන්  පාලනය කරගන්නත් උපකාරී වෙනවා.

ගෝවා

නැවුම් එළවළු වර්ග වැඩිපුර අපේ කෑම වේලට එකතු කර ගැනීම නිරෝගී ජීවන රටාවක් සදහා වැදගත් සාධකයක් වෙනවා. ගැස්ට්‍රයිටිස් තත්වය පාලනයටත් එළවළු වලින් ලැබෙන්නෙ හොඳ සහයෝගයක්. ආමාශ ප්‍රදාහය වලක්වාගන්න කෑමට ගන්න පුළුවන් සාර්ථක එළවළුවක් තමයි ගෝවා කියන්නෙ. ආහාරයට ගන්නවා වගේම ලේසියෙන්ම කරන්න පුළුවන් දෙයක් තමයි ගෝවා යුෂ පානය. ඔබත් ගැස්ට්‍රයිටිස්වලින් පීඩා විඳිනවා නම් දිනකට තෙවරක් පමණ ගෝවා පානයට ගැනීම ඔබට සහනයක් ගෙන දේවි. කැරට් වැනි තවත් එළවළුවක් එයට එකතු කරගත්තොත් රස වගේම ගුණයත් වැඩි කරගන්න පුළුවන්. ගෝවාවල තියෙන විටමින් නිසා ආමාශයේ තුවාල සුවවීමේ වේගය වැඩි කරනවා. ඒවගේම එහි ඇති ප්‍රතිඔක්සිකාරක නිසා ආමාශ පිළිකා අවධානමත් අඩු කරනවා.

ජීවන රටාවේ වෙනසක්

පහසුවෙන් හොයගන්න පුළුවන් කෑමබීම වලින් ගැස්ට්‍රයිටිස් වලට විසදුමක් හොයනවා වගේම එදිනෙදා පුරුදු සහ ජීවන රටා වෙනස් කරගන්න පුළුවන් වුණොත් මේ රෝග තත්ත්වය වඩාත් ඵලදායී විදිහට වලක්වා ගන්න පුළුවන්. අධික ලෙස මත්පැන් පානය හා දුම් පානය, දැඩි මානසික ආතතිය, බැක්ටීරියා හා වෛරස  ආසාදනත් ගැස්ට්‍රයිටිස් ඇතිවීමට හේතුවෙන්න පුළුවන්. වමනය, ඔක්කාරය, ආමාශයේ දැවිල්ල හා බඩ පිපීම වගේම කෑම රුචිය නැතිවීම මෙහි මූලික රෝග ලක්ෂණ වෙනවා

●       ඔබට ගැස්ට්‍රයිටිස් තත්වය වැඩි කරන කෑම වර්ග හදුනාගෙන ඒවා ආහාරයට ගැනීම අවම කරන්න. බොහෝවිට තෙල් හා මිරිස් අධික ආහාර, ක්ෂණික ආහාර වර්ගවලින් ගැස්ට්‍රයිටිස් වැඩිවෙන්න පුළුවන්. එවැනි ආහාර භාවිතය පුළුවන් තරම් අවම කිරීම නුවණට හුරුයි.

●       විවේකයක් ඇති හැමවිටම මනස නිදහස් කරවන භාවනා හා යෝගා වැනි ක්‍රියාකාරකම්වල නිරත වෙන්න. එමගින් ගැස්ට්‍රයිටිස්වලට විශාල වශයෙන් බලපාන මානසික ආතතිය අවම කරගන්න පුළුවන් වගේම තෘප්තිමත් ජීවිතයක් ගතකරන්නත් අවස්ථාවක් උදා වෙනවා.

●       නිරෝගී ජීවිතයකට ජලය පානය කිරීම ඉතාම වැදගත්. ඒ වගේම ගැස්ට්‍රයිටිස් තත්ත්වයන්  පාලනයටත් දිනකට වතුර වීදුරු 6-8ක් වත් පානය කිරීම උපකාරී වෙනවා.

●       දිනපතා නිසි පරිදි කායික ව්‍යායාම වල නිරත වෙන එකත් අත්‍යාවශ්‍යයි. අවම වශයෙන් සතියකට දින 3-4ක් වත් විනාඩි 30 බැගින් ව්‍යායාමවල නිරත විය යුතු වනවා.

ආමාශ ප්‍රදාහය නැත්නම් ගැස්ට්‍රයිටිස් තත්වය අද ගොඩාක් දෙනෙක් නොසලකා හරින තත්වයක්. සමහර  අවස්ථාවන් වලදී ගැස්ට්‍රයිටිස් තත්වය ආමාශයේ පිළිකා අවස්ථාවක් දක්වාම වැඩිදියුණු විය හැකි නිසා මෙය නොසලකා හැරීම එතරම් නුවණට හුරු දෙයක් නෙමේ. මෙම තත්වය වලක්වාගන්න නිවසේදීම ගන්න පුළුවන් පියවර ගන්නව වගේම වෛද්‍ය උපදෙස් ලබා‍ගැනීමත් ඉතාම වැදගත් වෙනවා.