ස්වාභාවික රසකාරක...

සුපිරි වෙළෙඳසල්වල හෝ කඩපිළවල අලෙවිය සඳහා තිබෙන කල්තබා ගැනීමේ ක්‍රම අඩංගු රසකාරකවලට වඩා දේශීය වශයෙන් සපයාගත හැකි කුළුබඩු රසකාරක වශයෙන් යොදා එළවළු සහ මස්, මාළු රසගන්වා ගැනීමට කැමැති ගෘහණියන් අතර ඔබත් සිටිනවාද? එහෙම නම් එවැනි රසකාරක ගැන දැනුවත් විය හැකි අපූරු දැනුම ඔබට මිල කළ නොහැකි වටිනාකමක් ගෙන ඒවි.


චීනයෙත්, ශ්‍රී ලංකාවෙත් බහුලව ඔෟෂධයක් මෙන්ම රසකාරකයක්ද වූ ඉඟුරු පසුව අරාබිය ඔස්සේ යුරෝපයට සේන්දු වී අද මුළු ලෝකයම පාහේ භාවිතයට ගන්නා රසකාරකයක් ලෙස ප්‍රසිද්ධය. ඉඟුරු ප්‍රභේද කිහිපයක් වුවද සිරිලකෙහි බහුලව තිබෙන්නේ දේශීය ඉඟුරු සහ චීන ඉඟුරුය. දේශීය ඉඟුරුවල කෙඳි බහුලය. මෙහි මාංසල ගතිය වැඩි අතර කට දෑම වැඩිය. අමු සහ වියළි යනුවෙන් මේ ඉඟුරු දෙකට බෙදේ. ආයුර්වේදයේ ඔෟෂධයක් ලෙස ගන්නේද මෙම ඉඟුරු වර්ගය. පිසීම සඳහා ගැනීමේදී ඉඟුරු බොහෝ විට අබ සහ සුදුලූනු සමඟ එකට යෙදෙන්නේ අච්චාරු චට්නි සහ සෝස් වර්ග සාදන විටය.
රසකැවිලි සඳහා බහුල ලෙස යොදාගන්නේ චීන ඉඟුරුය. චීන ඉඟුරු අල ප්‍රමාණයෙන් විශාලය. මාංසල බව අධිකය. කෙඳි අල්ප වුවද තෙතමනය බොහෝය. මේවා ඉඟුරු දෝසි සඳහාත්, ඉඟුරු පැණිය සඳහාත් ඉතාම යෝග්‍යය.


උළුහාල්
වාතය සෙම සමනය කරවන උණ අජීර්ණයට සුව ගෙනෙන, කෑම රුචිය වඩවන, කාන්තාවන්ගේ ගර්භාෂයට හිතකර, මවුකිරි වර්ධනයට කදිම ඔෟෂධීය කුළුබඩු ද්‍රව්‍යයකි. උළුහාල් සමඟ දෙහි පෙති තම්බා හිස ගල්වා නෑම කාන්තාවන්ගේ ප්‍රතිකාර ක්‍රමයක් වේ. හිස ගල්වන පොල්තෙල් බෝතලයට බදින ලද උළුහාල් එක්කිරීමෙන් හිසටත් හිස කෙස්වලටත් හිතකර බව අපේ ගැමි ජනතාවගේ මතයයි.


ආහාර රසගැන්වීමේදී
උළුහාල් මාළු වෑංජනය සඳහාත් වෙනත් වෑංජන සඳහාත් යොදාගනු ලබයි. උකු බව සහිත හොද්දටත් පොල් කිරි හොද්දටත් ප්‍රධාන වශයෙන් උළුහාල් යොදාගනියි. මෙම උකු බව ඇතිවන්නේ උළුහාල් පෙඟීම නිසා එහි වටා අඩංගු බෙලසුල් ද්‍රව්‍ය මතුවීමෙන්ය.


අබ
ආයුර්වේද මතයට අනුව ඔෟෂධීය ලෙස ගත හැකි කුළුබඩු විශේෂයකි. පිත වඩන සෙම සහ වාතය සමනය කරන තියුණු උෂ්ණ සහ කටුක ගුණ සහිත අබ පණු රෝග නසයි. හෘදය උත්තේජනය කරයි. පමණ ඉක්මවා එක්කර ගැනීමෙන් අත්වන විපාක අනිටුය.


අබ වර්ග කිහිපයක් ඇතත් අප රටේ බහුලව භාවිත වන්නේ කළු අබය. අබ තෙල්ද අල්ප වශයෙන් ආහාර පිළියෙල කිරීමේදී භාවිතයට ගනියි. අච්චාරු, චට්නි, සෝස් සඳහා අබ අනිවාර්යයෙන් යොදාගන්නා අතර මස්, මාළු සහ වෑංජන සුවිශේෂීව රසගැන්වීමටත් එක්කර ගනියි. ආහාර වර්ග පිසීමේදී තෙම්පරාදුව සඳහා (තෙල් හොඳින් රත්වූ විට) පළමුව අබ එකතු කර ගනියි. එලෙසම හැම භෝජන සැකැස්මක් සඳහාමත් අබ යෙදිය නොහැකියි.
එනසාල් (කරදමුංගු)
ආයුර්වේදී වෛද්‍ය ශාස්ත්‍රයට අනුව තුන්‍ෙදාස් සමනය කරන උදර රෝග, මුඛ රෝග, සෙම් රෝග නසන සුවඳකාරක රසායනික ඔෟෂධයකි. බුලත් විට රසගැන්වීමටද යොදාගන්නා රසවත් අන්තර්ගතයකි. ආහාර පිසීමේ කටයුතුවලදී මස්, මාළු සහ වෑංජන රස ගැන්වීමටත් සුවඳ ගැන්වීමටත් එක්කර ගනියි. වාතයට විවෘතව තිබීම නිසාත් කල්ගත වීම නිසාත් එහි අඩංගු රසය, ගුණය, සුවඳ හීනව යයි.
කරාබුනැටි
කාන්තාවන්ගේ කනෙහි පලඳින කරාබුවක හැඩයට සමාන කරාබුනැටි ඇත්ත වශයෙන්ම විකසිත නොවූ එහෙත් මුහුකුරා ගිය මලකි. පිපීමට ආසන්න, රෝස සහ සුදු මිශ්‍ර පැහැගැන්වුණු අධික සැර සුවඳකින් සහ රසයකින් යුත් වාෂ්පශීලී තෛලමය රසායනයක් සහිත වෙයි. ආයුර්වේද සහ බටහිර වෙදකමෙහි ආලේපන සහ විලේපන ආදිය නිපදවීමේදී කරාබු නැටි තෙල් බහුලව යොදාගනියි.
මාළු සහ මස් පිසින විට නැතිව බැරි කරාබු නැටි, බත් වර්ග සුවිශේෂීව පිසීමේදීද යොදාගනියි. කැවිලි වර්ග සුවඳවත් කිරීමට සහ රස ගැන්වීමටද කරාබු නැටි නිසි මාත්‍රාවක් අනුව මිශ්‍ර කර ගනියි. විස බීජ නැසීමේ ශක්තියක් කරාබු නැටිවල තිබෙන නිසා මස්, මාළු සහ එළවළු ආදිය යම් ප්‍රමාණයකට එමඟින් සංරක්‍ෂණය වෙයි.
එහෙත් ගෘහණියන් දැනගත යුතු දෙයක් වන්නේ කරාබු නැටි ආහාර පිසීමේදී යොදන විට එය සැලකිලිමත් ලෙස අල්ප වශයෙන් ප්‍රමාණ කරගත යුතු වගය. එලෙසම කරාබු නැටි වාතයට විවෘත වීමෙනුත් කල්ගත වීමෙනුත් එහි රසය හා සුවඳ හීන වෙයි. කුඩා බෝතලයක දමා පියන තදින් වසා තබා ගැනීමෙන් වියැකී යන සුගන්ධයත්, රසයත් ආරක්‍ෂා කරගත හැකිය.

Wmqgd .ekSu u