හතර කේන්දරේ පාළු වුණත් මොකද සිංහාසනයක් හිමිනම්

ග්‍රහයෝග අතර සිංහාසන යෝගය බලවත් යෝගයක් ලෙස සැලකෙන අතර මෙම යෝගය ඇතිව උපදින දරුවන් කුඩා කල නොමළහොත් සිංහාසනයේ වාඩිවනවා යැයි පැරැණි පොතපතෙහි සඳහන්ව ඇත. රජ වීම කෙසේ වෙතත් උපත ලද කාලයේ තිබූ තත්ත්වයට වඩා ධනයෙන්, බලයෙන්, කීර්තියෙන් ඉහළට යෑම මෙහි මූලික අදහස වනු ඇත. රටේ අගමැති හා ජනාධිපති වැනි ඉහළ නිලයකට පත්වීමට නොහැකි වුවත් තමා ජීවත් වූ ආර්ථික තත්ත්වයට වඩා ඉහළ තත්ත්වයකට යෑමට මෙම සිංහාසන යෝගය උපකාරි වනු ඇත. 2, 6, 8 සහ 12 යන ස්ථානවල බලවත්ව ග්‍රහයන් යෙදීම සිංහාසන යෝගයට මූලික වනු ඇත. මෙම කේන්දර සටහන 1, 4, 7, 10 හිස් වූ කේන්දර සටහනකි. එහෙත් 2, 6, 8 සහ 12 යන ස්ථානවල ග්‍රහයන් පිහිටා ඇත. මෙම කේන්දර සටහන හිමි තැනැත්තාද කුඩා කල ආර්ථික අපහසුතාවලට මුහුණදී අද වන විට ධනවතෙක් බවට පත්වී ඇති කෙනෙකි. 2, 6, 8 සහ 12 යන ස්ථාන 4න් තුනක හෝ ග්‍රහයන් පිහිටීමද තරමක් දුරට සුබපල ඇති කරයි. ව්‍යාපාරික ලොව ඉහළ තලවල සිටින අය මෙම යෝගයෙන් උපත ලබා ඇත. මූලික අධ්‍යාපනය පවා නොලද හතර කේන්දරය පාළුවට ඇති අයද මෙම සිංහාසන යෝගය නිසා මහා ධන කුවේරයන් බවට පත්වූ අවස්ථා ඇත. සිංහාසන යෝගය තම ජන්ම පතේද තිබෙනවා යැයි කියා අලස වී ගෙදරටම වී නිදා ගැනීමෙන් මෙම යෝගයේ ප්‍රතිඵල ලැබෙනවායි නොසිතන්න. "තමන් හිසට තම අතමය සෙවණ" කොට දෙනවා සේම තමාගේ දියුණුව සලසා ගත යුත්තේ තමන් විසින්ම බවද අමතක නොකරන්න.

ජේ‍යාතිර්වේදිනී ප්‍රියංගනි හෙට්ටිආරච්චි 0714983497 මව්බිම


sithmalyaya.com