සසිරි ගණදෙවි නුවණ මට දෙන්

නුවණින් තොරව කරනු ලබන කිසිම දෙයකින් ලැබෙන ප්‍රතිඵල සතුටුදායක නොවේ. තැනට සුදුසු ලෙසින් කරන ක්‍රියාව යනු නුවණින් යුතුව කරනු ලබන්නක්‌ බැවින් ඉන් ලැබෙන දේ මහාර්ඝ වනු ඇත. එහෙයින් නුවණ නමැති මධුර ඵලයෙහි වටිනාකම මෙතෙකැයි කිව නොහැක.

එවන් වූ නුවණට අධිපති දෙවියන් ලෙස සැලකෙනුයේ ගණ දෙවිඳුන්ය. විෂ්ණු දෙවියන්ට පවා බට කොළ කැවූ බව කියන සෙනසුරුත් තම නුවණෙහි බලමහිමයෙන් නිහඬ කරනු ලැබුවේ එතුමන් යෑයි පැවසේ.

ගණදෙවිඳු ශිව දෙවිඳුන්ගේ හා පාර්වතී දේවියගේ වැඩිමහල් පුත්‍රයා ලෙසද කඳ කුමරුන්ගේ සොහොයුරා ලෙසද සැලකේ. ගණ යනු ශිව දෙවියන්ගේ පිරිවරයි. ඔවුන්ට නායකත්වය දෙන්නා යන අරුතින් ගණේෂ් නැත්නම් ගණපති යන නම්වලින්ද එතුමන් හඳුන්වා ඇත.

දරුවකුට අකුරු කියවීමේදී තිසරණ සහිත පන්සිල් සමාදන්ව ගණදෙවියන්ට හා සරස්‌වතී දේවියට පුද පූජා තැබීම මෙරට චාරිත්‍රයක්‌ව පවතී. එසේම උසස්‌ විභාගවලට මුහුණ දීමට පෙරද එවැනි දේ සිදු කරන අයුරු දක්‌නට ලැබේ.

ඒ හැරුණු කොට එදිනෙදා සිදුකරන අධ්‍යාපන කටයුතුවලදී ගණදෙවිඳු සිහි කරන ආකාරය පැරණි පුස්‌තකයක්‌ වන වදන් කවි පොතේ මෙලෙසින් දැක්‌වේ.

වැඳලා දෙවියන් පොත අරග න්නේ
යෑදලා ගුරුනුත් සිත නොතල න්නේ
සකලා සිල්පය මට සෑදෙ න්නේ
දැකලා ගණදෙවි නුවණක්‌ දෙ න්නේ

ගණදෙවි පූජාව මුලින්ම ඇරඹුණේ කෙදිනකදැයි කිව නොහැකි වුවත් භාරත දේශයෙන් අපට ලැබුණු දෙයක්‌ බව නම් පැහැදිලිය. දක්‍ෂිණ භාරතීය හින්දු බලපෑම් ඇති වූ පොලොන්නරු යුගයේදීද ඇතැම් විට ඊටත් පෙර සිට ලක්‌වාසී හින්දු බෞද්ධ දෙපිරිසගෙන්ම පිදුම් ලබන දෙවියකු ලෙස විද්වත්හු එතුමන් හඳුන්වති. නුවර කලාවියේ ප්‍රධානතම දෙවියකු මෙන් සැලකෙන ගණ දෙවිඳු පුල්ලෙයාර් සාමි නමින් එහි ගරු බුහුමන් ලබයි. විග්aනේශ්වර, විග්න විනායක, විග්නහරණ, විග්න විනාශක (බාධා නසන්නා) ඇතුළු තවත් බොහෝ නම් එතුමන් උදෙසා භාවිත වේ.

ඉන්දීය සමාජයේ යමක්‌ "ආරම්භ කරනවා" යෑයි පවසන වැකියක්‌ වනුයේ" ශ්‍රී ගණේෂ් කර්නා" යන්නයි. ඊට සමානව අපගේ වදන් කවි පොතේ පළමු වැනි කවියේ අවසන් පද පේළියේ "පටන් ගනිමුව ගණ දෙවිඳු වැඳ" යනුවෙන් සඳහන් වේ.

එය වෙනත් තැනකදී "සර්ව ප්‍රථමයෙන් ඔබම පූජාවට පත් වේවි" ඔබට අග්‍ර පූජාව නොකොට කිසිවකුගේ කාර්ය සිද්ධියක්‌ නොවනු ඇතැයි ශිව දෙවියන් ගණ දෙවිඳුට කරන ලද ආශිර්වාදාත්මක ප්‍රකාශයක්‌ ලිංග පුරාණයෙහි වේ.

ව්‍යාස සෘෂිවරයාට මහා භාරත කාව්‍යය රචනා කිරීමේ අදහස ඇති වී ඒ ගැන බ්‍රහ්ම දෙවියන්ගෙන් විමසුවේය. එවිට එතුමන් ව්‍යාස සෘෂි හට මෙවැනි උපදේශයක්‌ දෙනු ලැබීය.

" කාව්‍යස්‌ව ලේඛනාර්ථාය ගණේශඃ ස්‌මරණතාං මුනේ" මෙහි අරුත "මුනිවරය ඔබගේ කාව්‍යය රචනා කර ගැනුමට ගණ දෙවිඳුන් ස්‌මරණය කරන්න" යන්නයි. ඇස්‌වහ කටවහ හා අනවින කොඩිවිනවලින් ආරක්‌ෂා වීම, පෙම්වතුන් හා යුවතිපතීන් හමුවේ ඇති වන බාධා ගැටලු විස¹ ගැනීම, දරු ඵල වාසනාව, අමනුෂ්‍ය දොaෂ හා රෝගවලින් බිලිඳුන් ආරක්‌ෂා කර ගැනීම යනාදියත් ගණ දෙවියන්ට තබන පුද පූජාවලින් හා බාරහාර වීමෙන් ඉටු කරගත හැකි බව බැතිමතුන්ගේ විශ්වාසයයි.

එමෙන්ම ශුභ ලාභ හා යස ඉසුරු ලබා දෙන දෙවියකු ලෙසද ගණ දෙවිඳුන් පිළිගැනුමට ලක්‌ වී ඇත. ස්‌වර්ණාභරණ කර්මාන්තයේ යෙදී සිටින හෙට්‌ටි ජනතාව ගණපති පිදුමට ප්‍රමුඛස්‌ථානයක්‌ ලබා දීමෙන් එහි සම්බන්ධයක්‌ ඇතැයි සිතේ. ගණදෙවි උපත පිළිබඳව ඇති රසවත් කතා පුවත් බ්‍රහ්මාණ්‌ඩ පුරාණ, මත්ස්‍ය පුqරාණ ආදී ග්‍රන්ථවල දක්‌නට ලැබේ.

දිනක්‌ භගවාන් ශංකර් හෙවත් ශිව දෙවිඳු ජල ස්‌නානය සඳහා භෝගවතී නම් ස්‌ථානයට ගියේය. තම ස්‌වාමියා පිටත්ව ගිය පසු පාර්වතී දේවිය පුරුෂ රුවක්‌ තනා එයට ප්‍රාණය ලබා දී ගණේශ්a යෑයි නම් තැබුවාය. අනතුරුව ඔහු දොරටුවේ මුරට තබා තමන් ස්‌නානය කර එන තුරු කිසිවකු නිවසට ඇතුළු වීමට ඉඩ නොදෙන්නැයි අණ කළාය.

භෝගවතියේ ස්‌නානයෙන් පසු ශිව දෙවියන් යළි පැමිණි විට ගණේෂ දොරටුවෙන් ඇතුළු වන්නට ඉඩ නොදුන්නේය. කෝපයට පත් ශිව දෙවි ඔහු හිස කඳින් වෙන් කොට නිවසට ඇතුළු විය.

මේ කිසිවක්‌ නොදත් පාර්වතිය දිවා භෝජනය ප්‍රමාද වී තම ස්‌වාමියා උදහස්‌ වෙතැයි සිතා වහාම ආහාර බෙදූ තැටි දෙකක්‌ තබා බොජුන් වළඳන්නැයි ශිව දෙවිඳුන්ට කීවාය. තැටි දෙකක ආහාර තිබෙන අයුරු දුටු ශිව දෙවිඳු අනෙක්‌ තැටියේ ආහාර කාටදැයි විමසීය. එය දොරටු ආරක්‌ෂකයාට යෑයි පාර්වතිය පිළිතුරු දුන්නාය. තමන් ඔහුගේ හිස ගසා දැමූ බව එතුමන් කී විට ඇය බොහෝ දුකට පත්ව ප්‍රිය පුත්‍ර ගණේෂ්ට යළි ජීවිතය දෙන්නැයි අයෑද සිටියාය.

වහාම වනයට ගිය ශිව දෙවිඳුන් ඇත් පැටවකුගේ හිසක්‌ ගෙනැවිත් ගණේෂ්ගේ කවන්ධයට සවිකර ප්‍රාණය ලබා දුන්නේය. ඉමහත් සතුටට පත් පාර්වතිය ස්‌වාමියාට හා පුතුට භෝජනය භුක්‌ති විඳීමට ඉඩ සලසා තමන්ද බොජුන් වැළඳුවාය.

මෙම සිද්ධිය භාද්‍රපද් ශුක්‌ල පක්‍ෂ චතුර්ථීදින් එනම් බිනර මස පුර පස සිවු වැනිදා සිදු වූයේය යන විශ්වාසයෙන් එය "ගණේශ් චතුර්ථි" උළෙල ලෙස ඉන්දියාවේ උත්කර්ෂවත්ව සැමරේ. ඒ අතරින් ජයපුර් නගරයේ මෝතී ඩුංගිරිහි පිහිටි ගණේශ දේව මන්දිරය ලක්‌ෂ ගණනක බැතිමතුන්ගේ සහභාගිත්වයෙන් පවත්වන මහෝත්සවය විචිත්‍රවත්ය.

ගණ දෙවි උපත සේම එතුමන්ගේ අසිරිමත් වූ නුවණ විදහා පෑ අවස්‌ථාද රැසකි. වරෙක ගණ දෙවිඳුන් හා සිය බාල සොහොයුරු කඳ කුමරුන් අතර තරගයක්‌ විය. එනම් ලොව වටා ගොස්‌ පළමුවෙන් පැමිණිය හැකි කාටදැයි යනුවෙනි. තරගය ඇරඹිණි. මයුර වාහනයේ නැඟි කඳ කුමරු වේගයෙන් පිටත්ව ගියේය. ගණ දෙවිඳුගේ වාහනය මූෂිකයෙකි. මයුරකු හා මූෂිකයකු අතර කුමන තරගයක්‌ද? ගණ දෙවිඳු පසුබට වූයේ නැත. වහාම ගොස්‌ තමා දෙමාපියන් වැඳ ඔවුන් වටා ප්‍රදක්‌ෂිණා කොට පසෙකට වී සුවසේ පසු විය.

ටික වේලාවකට පසු පැමිණි කඳ කුමරු "සොහොයුර ඔබ ලොව වටා ගිය බවක්‌ නම් නොපෙනෙයි. එබැවින් දිනුම මටයි" කීවේය. එවිට පිළිතුරු දුන් ගණ දෙවිඳු " මලණුවනි දරුවකුට දෙමාපියන් යනු ලෝකය හා සමානයි. එහි කිසි විවාදයක්‌ නොමැතියි. එහෙයින් මම ඔවුන් වටා ප්‍රදක්‌ෂිණා කළෙමි. එය ලොව වටා ගමන් කිරීමක්‌ වැනිය" යනුවෙන් කීය.

මෙය අසා සිටි ශිව පාර්වතී දෙදෙනාද එම කියමන අනුමත කළහ. අනතුරුව තම පුත්‍ර ගණ දෙවිඳුන්ගේ නුවණ ගැන පැහැදී ජයග්‍රහණය පිරිනැමූහ.

ඉහත කතා පුවත් ඉන්දීය සාහිත්‍යයට අයත්ය. එහෙත් "ගණ දෙවි හෑල්ල සහ වදන් කවි පොත" ඇතුළු තවත් පොත් රචනා වී තිබීමෙන් අප රටේද ගණ දෙවියන් වටා ගොඩනැඟුණු සාහිත්‍යයක්‌ බිහි වී ඇති බව පෙනේ.

ගණ දේව මූර්තිය ගැන විමසා බලන විට සාමාන්‍යයෙන් ඇතකුගේ මුහුණකින් යුතුව නිර්මාණය කර ඇත. එහි දළ දෙකින් එකක්‌ කැඩී ගිය අයුරු දිස්‌වෙයි. අත් සතරක්‌ ඇති අතර, ඒවායෙහි නෙළුම් මලක්‌, කුඩා පොරවක්‌, ඇත් දතක්‌ හා මෝදක හෙවත් අග්ගලා ද වේ. මහත් වූ සිරුරකින් හා ඉදිරියට නෙරූ උදරයකින්ද යුක්‌තය. බඳ වටා නාගයකු ඔතා ගෙන ඇත. අත් පා කොටය. වාහනය මූෂිකයෙකි.

හිටි පිළිම, හිඳි පිළිම හා නැටුම් දක්‌වන ගණ දෙවි මූර්තිද ඇතැම් විට දැකිය හැක. යුග වශයෙන් ගත් කල කෘතා, තේ්‍රතා, ද්වාපර හා කලියුග යනාදී යුගවල නිර්මාණය වූ මූර්තින් වෙනස්‌ ස්‌වරූපවලින් යුක්‌තය.

ඉන්දුනීසියාව, චීනය, ජපානය, කාම්බෝජය, මියන්මාර් දේශය, නේපාලය, ටිබෙට්‌ දේශය, බෝර්නියා, තායිලන්තය හා ජාවා, සුමාත්‍රා ආදී දේශයන්හිද ගණ දේව මූර්ති තිබෙන අතර, එම රටවල මෙම දෙවිඳුන් ඒ ඒ ස්‌ථානීය නාමයන්ගෙන් හඳුන්වති.

මෙරට ගණ දෙවිඳුන් උදෙසා ඉදි වූ පුද බිම් අතර, සෙල්ලකතරගම මැණික්‌ නදිය මධ්‍යයෙහි පිහිටි ගණ දෙවි කෝවිල බැතිමතුන්ගේ සිත් ගන්නා සුලුය. ඒ හැරුණු විට කතරගම මහ දේවාලය අසල තිබෙන දෙවොල ඇතුළු දිවයිනේ නොයෙක්‌ ස්‌ථානවල ස්‌ථාපිත වූ ගණ දෙවි කෝවිල්ද, බෞද්ධ පුද බිම් ආශ්‍රිතව පිහිටි දේවාලද දැකිය හැකිය.

නුවණට අධිපතිව බාධා දුරු කරමින් සුබ ලාභ හා යස ඉසුරු ලබා දෙමින් විරාජමානව වැඩ සිටින ගණ දෙවිඳුන්ගේ දේවාශිර්වාදය සැමටම ලැබේවා·

Wmqgd .ekSu Èjhsk mqj;a m; weiqfrks