උපන් දිනයටම මරු කැඳවන ග්‍රහ යෝග

මේ දිනවල ජන සමාජය තුළ නිතර කතාබහ වන හා අපිට ජනමාධ්‍ය තුළින් අසන්නට ලැබෙන ප්‍රමුඛ මාතෘකාවක් වී ඇත්තේ විවිධාකාරයේ අනතුරු, ස්වාභාවික විපත් හේතුවෙන් මිය යන සංඛ්‍යාවේ කැපී පෙනෙන ඉහළයෑමක් දක්නට ලැබේ. විශේෂයෙන් යුද්ධය පැවැති පසුගිය කාලයටත් වඩා වැඩි අගයකින් අද වන විට හදිසි අනතුරුවලින් මියයෑම මෙන්ම විවිධාකාරයේ ආබාධයන්ට ලක්වන ප්‍රමාණය අති මහත්ය. මෙම කාරණය වත්මන් සමාජය තුළ කැපී පෙනෙන මාතෘකාවක් බවට පත්ව ඇත. විශේෂයෙන්ම මෙම අනතුරු හේතුවෙන් වැඩි වශයෙන් අපිට අහිමි වනුයේ අපේ රටේ සම්පත වන් දරුවන්, තරුණ තරුණියන් හා වැඩිහිටි ජනතාවයි.

මෙම පවතින ගැටලුවට විසඳුම් සොයා ගත යුතු කාලය දැන් උදාව ඇත.
හදිසි අනතුරු ස්වාභාවික විපත් හෝ රෝගාබාධ හේතුවෙන් අකාලයේ මිය යන පුද්ගලයන්ගේ ජන්ම පත්‍ර තුළ මෙම අල්පායුෂ යෝග හා ග්‍රහ පිහිටීම් සඳහන්ව ඇත්තේද යන්න පිළිබඳ මෙම ලිපියෙන් අද අපි විමසා බැලීමට අදහස් කරන්නෙමු. යම් ජන්මියකු මෙලොව උපදින විට හා ළමා කාලයේදී තදබල ලෙස අපල ඇති කරන බාලාරිෂ්ට යෝග නැතහොත් ආයුෂයට පීඩා ගෙන එන ග්‍රහ පිහිටීම් රාශියක් මෙන්ම එක් එක් වයස් සීමාවලදී මෙන්ම තමන් උපන් දිනයේම මියයෑමට ලක්වන ග්‍රහ යෝග හා ග්‍රහ පිහිටීම් උසස් ජේ‍යාතිෂයේදී පුරාණ ඉසිවරු විසින් ඉපැරැණි පොත් පත්වල දක්වා ඇත. ඒ අනුව මෙම ලිපිය මඟින් අපි අද සාකච්ඡා කරන්නේ ඉන් කීපයකි. මෙම පහත තත්ත්වයන් උදා වීමට ජන්මියාගේ උප්පත්ති ග්‍රහ චාරයේ මීට සම්බන්ධ ග්‍රහයන්ගේ බල දුබලතා බෙහෙවින්ම බලපානු ලබයි.


වත්මන් සමාජයේ වැඩි වශයෙන් අනතුරු සිදුවන්නේ රථ වාහන හේතුවෙන්, මහ මඟ අතරමඟදී හදිසි අනතුරකින් මියයෑම කෙරෙහි පිහිටන ග්‍රහ යෝග විමසා බැලීමේදී පස් වැන්නාධිපති හා ‍ෙදාළොස්වැන්නාධිපති නීච වී අඩු නැතිවම නීච ග්‍රහයන් දුටුවහොත් එම ග්‍රහයන් පස් වැන්නාධිපති නොදුටුවහොත් එම තැනැත්තා මිය යන්නේ මහ මඟ සිදුවන හදිසි අනතුරුවලින්ය.


ජේ‍යාතිෂයේ ඉගැන්වෙන අන්දමට යම් තැනැත්තකු හදිසි අනතුරුවලට ලක්වී මියයෑමට බලපානු ලබන ග්‍රහ පිහිටීම් එකක් දෙකක් නොව සිය ගණනක්ම වෙයි. හදිසි අනතුරු වශයෙන් හඳුන්වනු ලබන්නේ වාහනවලින්ම සිදුවන අනතුරු පමණක් නොවේ.
ජන්ම පත්‍ර තුළ හදිසි අනතුරුවලට ලක්විය හැකි ග්‍රහ යෝග අපිට හඳහන් පරීක්ෂාවේදී දැකගත හැකිය. කෙසේ වෙතත් ඔබේ ලග්නයේ ලග්නය, ලග්නාධිපති, චන්ද්‍ර හා රවි යන ග්‍රහයන් හතර දෙනාගෙන් තුන් දෙනකුවත් දුබල වී ඔවුන් පාපී ග්‍රහයන්ට මැදිවී අසුබ ග්‍රහයන් සිටීමකට හෝ දැකීමකට ලක්වේ නම් ඔබේ කේන්දරයේ හදිසි අනතුරු යෝගයක් ඇති බව වටහා ගන්න.


යම් ජන්මියකු උප්පත්ති අවස්ථාවේදී රවි හා කුජ යන ග්‍රහයන් දෙදෙනා සංයෝග වී සඳුගෙන් 7 වැන්නේත් රාහු ලග්නයේත් තැන්පත්ව සිටිය හොත් එම ජන්මියා දින 10කින් මියයෑමට හැකියාව ඇත.
එමෙන්ම සෙනසුරු ලග්නයේම වී චන්ද්‍ර හෝ රවි හත්වැන්නට වී යමකු උපත ලැබුවහොත් 4 වැන්න පඨවි රාශියක් වී එහි පාපී ග්‍රහයන් වේ නම් එයද හදිසි අනතුරු ගෙන දෙන තත්ත්වයකි. එවැනි අය මියයන්නේ වාහනවලින් සිදුවන හදිසි අනතුරුවලින් නොව තාප්ප, කඳු, ගොඩනැඟිලි, යකඩ සුන්බුන් ආදියට යටවීමෙනි.
චන්ද්‍රයා ලග්න භාවයේද රවි 9 වැනි භාවයේද කුජ හෙවත් අඟහරු 8 වැනි භාවයේද සෙනසුරු 12 වැනි භාවයේද ජන්ම පත්‍රයක පිහිටා සිටිය කල එම ග්‍රහයන් සුබවාදී ගුරු හෙවත් බ්‍රහස්පතිට නොපෙනෙන්නේද එම ජන්මියා ඉපදුණු වහා මරුමුවට පත් විය හැකිය. නමුත් ගුරු 5 වැන්නේ ප්‍රබලව සිටිය හොත් පමණක් ඔහු ජීවත් වනු ඇත.


ඉහත ආකාරයටම ග්‍රහයන් තැන්පත් වී 4 වැන්නේ ජල රාශියක් යෙදුණහොත් ඔහු නියත වශයෙන්ම මිය යන්නේ ජලයේ ගිලීමෙනි. එමෙන්ම කේන්දරයක 8 වැන්නෙහි සඳු සිට ශනි, කුජ යන ග්‍රහයන් සංයෝග වුවහොත් හෝ එම ග්‍රහයන් දකින්නේ නම් එම තැනැත්තා මියයන්නේද ජලයේ ගිලීමෙනි. ජේ‍යාතිෂ මතයන්ට හා නියමයන්ට අනුව ඔහු වයස අවුරුදු 32දී හෝ 39දී මියයයි.


පාප ග්‍රහයන්ගෙන් පීඩිත වූ සඳු 12 වැන්නට පැමිණ ජන්මයක් ලැබුවහොත් පාප ග්‍රහයන්ගේ දශා කාලයක් පැමිණි විට එම තැනැත්තා දියේ ගිලී මියයන්නේය.
එසේම යම් අයකුගේ කේන්දරයේ 6 වැන්න කටක, මීන වැනි ජල රාශියක් වී හතර වැන්න දුබල වී නිම වූ අවස්ථාවක් වේ නම් ඔහු මියයන්නේද දියේ ගිලීමෙනි.
කේන්දරයක 5 වැන්නාධිපති, 9 වැන්නාධිපති සමඟ පාප ග්‍රහයන් සමඟ සංයෝග වුවහොත් අටවැන්නාධිපති අටෙහි චන්ද්‍ර නොදුටු යෝගයකින් උපත ලැබූවකු වේ නම් ඔහු නියත වශයෙන්ම මියයන්නේ නැව්, පාරුව හෝ ඔරුවෙන් ජලයට වැටීමෙනි.


රාහු හා ලග්නාධිපති ග්‍රහයා දුර්වලව සංයෝග වී 7 වැනි රාශියේ තැන්පත්ව සිටි කළ 21 මසකින් හෝ 21 දිනකින් එම ජන්මියාට විපතක් සිදු වනු ඇත. එම විපත හදිසි අනතුරකින් හෝ හදිසි රෝගාබාධයකින් සිදුවීමට ඉඩ ඇති අතර එය බොහෝ විට ඔහුගේ හෝ ඇයගේ උපන් දිනය දාම සිදු වූ අවස්ථා අප දැක ඇත.
8 වැන්නෙහි චන්ද්‍රයා හා රාහු යෙදී ලග්නයේ කෘෘර ග්‍රහයන් දුටුවහොත් ඒ රුදුරු ග්‍රහයන් හෝ දශා කාලයේදී එම තැනැත්තා මිය යන්නේ ඔළුව හෝ බෙල්ල කැපීමකිනි. කුජ ග්‍රහයා දෙවැන්නට පැමිණ නපුරු ග්‍රහයෙක් දුටු විට ඔහු මිය යන්නේ ගින්නකට හසු වීමෙනි. එසේම ඔහුගේ බිරියගේ කේන්දරයේ කුජ වැනි නපුරු ග්‍රහයෙක් 7 වැන්නේ සිටියහොත් විවාහ වී වසර 7කින් ස්වාමියා මිය යන්නේ ගින්නට හසුවීමෙනි. මෙම යෝගය වැන්දඹු යෝගයක් ලෙසද ජේ‍යාතිෂයේ ඉගැන්වෙයි.


අකුණුසැර වැදී හදිසි අනතුරකින් මියයන පුද්ගලයාගේ කේන්දරයක කුජ, යුරේනස්, 7 වැන්නාධිපතිව 12හි සිටියි. සුබ ග්‍රහයන් එම ස්ථානවල නොසිටීමද අකුණුසැර වැදී මිය යෑමට හේතුවකි. කුජ අට වැන්නේ සිටියදී රවි, කුජ ග්‍රහයන් මේෂ, සිංහ, ධනු වැනි රාශියක තැන්පත් වූ විට ඔහු මියයන්නේද අකුණුසැර වැදී හෝ වෙඩි බෝම්බ වැනි ක්‍රමයකට ගොදුරු වීමෙනි. චන්ද්‍රයා සමඟ පාපී ග්‍රහයකු යෝගව සිටිය විටදී 7 වැන්නේ හෝ ලග්නයේ පාපී ග්‍රහයකු සිටි කල්හි හා එම චන්ද්‍රයා සුබ ග්‍රහයෙක් විසින් නොදකින ලද්දේ නම් එම යෝගයෙන් උපන් ජන්මියා ඔහුගේ හෝ ඇයගේ උපන් දිනයෙන් දින කීපයකින් මිය යනු ඇත. එය බොහෝ විට සතියකට අඩු කාලයකි.


කුජ ලග්නයෙහි යෙදී රවි ග්‍රහයා ශනිගෙන් පීඩා වුවහොත් ඔහු මියයන්නේද ගිනි අවි, බෝම්බ හෝ ගින්නකට හසුවීමෙනි. කුජ දෙවැන්නට පැමිණ නපුරු ග්‍රහයන් දුටුවහොත් හා දෙවැන්නේ සුබ ග්‍රහයන් නැත්තේ නම් ඔහු මිය යන්නේද ගිනි බයෙනි. මෙවැනි ග්‍රහ පිහිටීම් දුම්රියට පැන වාහනයකට පැන තමන් විසින්ම මරණයට පත්වීමටද හේතු වෙයි.
සූර්යයා හා චන්ද්‍රයා යන ආලෝක ග්‍රහයන් දෙදෙනාම උප්පත්ති අවස්ථාවේදී කෘෘර පාපී ග්‍රහයන් සමඟ සංයෝග වී ලග්නයෙන් 3 වැනි භාවයේ තැන්පත්ව සිටිත් නම් ජන්මියා ප්‍රබල රෝගියකු වී වසර 3ක් ඇතුළත මිය යෑමට හැකියාව ඇත.


කේන්දරයක පස් වැන්නාධිපති 1, 5, 9 යන ත්‍රිකෝණ ස්ථානවල යෙදී ශනි හෝ රාහු සමඟ සංයෝග වුවහොත් ඔහුගේ මරණය ක්ෂණික මරණයකි. 09 වැන්නෙහි කුජ, ශනි, රාහු යන ග්‍රහයන් තුන්දෙනා සමඟ රවි යෙදී උපත ලැබුවහොත් අසුබ ග්‍රහයන්ගේ මහ දශා කාලයකදී ඔහු මියයන්නේ අවි ආයුධවලින් කැපුම් කෙටීම්වලින් ලද තුවාල හේතුවෙනි.
මේ ආදී වශයෙන් හදිසි අනතුරුවලට බලපානු ලබන ග්‍රහ පිහිටීම්, යෝග හා යෙදීම් ජේ‍යාතිෂයට අනුව ඉතා විශාල සංඛ්‍යාවක් පිහිටයි.
රවි හා ශනි යන ග්‍රහයන් දෙදෙනා කේන්දර ගතව හෝ සංයෝග වී හෝ වෙනත් රාශියක පිහිටා සුබ ග්‍රහයන්ගේ සුබ දුෂ්ටි නොලබයිද එසේ වූ කල්හි දෙවියන් බැලුවද එම ජන්ම පත හිමි ජන්මියා ඔහුට වයස අවුරුදු 11 වැනි වියේදී මරණයට පත් විය හැකිය. මෙම මරණයට පත්වීම හදිසි අනතුරක් හෝ හදිසි අසනීපයක් වීමට බොහෝ දුරට ඉඩ ඇත.


සෙනසුරු හෙවත් ශනි අඟහරු හෙවත් කුජ චන්ද්‍රයා හා රාහු යන ග්‍රහයන් එක්ව 7 හෝ 9 තැන්පත්ව සිටියේනම් මෙන්ම එම ග්‍රහයන් ලග්නයේ මෙන්ම නවාංශකයේද දුර්වලව පාප පීඩිත නම් එම ජන්මියා ඉපදී දින 4කින් බොහෝ දුරට මිය යා හැකිය.
සඳු හෙවත් චන්ද්‍රයා කිසියම් වූ ලග්නයකත් සියලුම පාපී ග්‍රහයන් 4, 7, 10 යන කේන්ද්‍රස්ථානවල තැන්පත්ව සිටියදී උපන්නා බොහෝ දුරට එවලේම මිය යෑමට හැකියාව ඇත. විශේෂයෙන් ඉහත ආකාරයේ ග්‍රහ පිහිටීම් ඉතා විරල ගණයේ වන අතර නවාංශකයේද ග්‍රහ ශක්තිය දුර්වල විය යුතු අතර ඉහත මියයෑම උපන්දාම මිය යෑමට තවත් උදාහරණයකි.


චන්ද්‍ර හෝරාවට සම්බන්ධ සඳු ජන්ම පතෙහි කේන්දර ස්ථානයකට අට වැන්න අධිපතියාද සමඟ සිටියදී 8 වැනි රාශියෙහි වෙනත් ග්‍රහයෙක් සිටීද මෙසේ වූ කල්හි එම ජන්මියා උපන් අවස්ථාවේදීම මිය යෑමට හැකිය.
රවි ග්‍රහයා ග්‍රහණය වී පාපී ග්‍රහයන් සමඟ ලග්නයේ පිහිටි කල කුජ හෙවත් අඟහරු ග්‍රහයා 8 වැන්නේ පිහිටිය හොත් ආයුධ පාවිච්චිය හේතු කොටගෙන දරුවා හා මව යන දෙදෙනාම මරණයට පත් විය හැකිය.
යම් කිසි ජන්මියකු උපදින අවස්ථාවේ සඳු ග්‍රහයා ලග්නගතව පාපී ග්‍රහයන්ට මැදිව සුබ ග්‍රහයන්ට නොපෙනෙන්නේද එසේම 7 හා 8 යන ස්ථාන දෙකෙහි පාපී ග්‍රහයන් සිටියේද එම අවස්ථාවේ උපදින දරුවා හා මව යන දෙදෙනාම එවලේම මිය යෑමට හැකියාව පවතී.


රවි හා සඳු යන ග්‍රහ දෙපළ සංයෝගව තැන්පත් රාශියෙන් කේන්දර ස්ථානයක 9 වැන්නේ පාපී ග්‍රහයකු ඉතාම දුර්වලව තැන්පත්ව සිටියේ නම් එම ජන්මියා දියේ ගිලීමෙන් හෝ වස විස පානයෙන් මරුමුවට පත් විය හැකිය.
ඉහත සඳහන් කර ඇත්තේ හදිසි අනතුරු ස්වාභාවික විපත් වැනි උපද්‍රව හේතුවෙන් අඩු වයසින් විශේෂයෙන්ම තමන්ගේ උපත සිදු වූ දිනයේදීම මරණයට පත්වන හා තවත් ඒ ආකාරයට රථ වාහන හෝ වෙනත් අයුරකින් මරුමුවට පත්වන ජන්මීන්ගේ හඳහන් තුළ දක්නට ලැබෙන ග්‍රහ පිහිටීමය. විශේෂයෙන්ම පසුගිය කාලය තුළ ඉහත සඳහන් ආකාරයට හදිසි අනතුරුවලින් මිය ගිය ජන්මීන්ගේ ජන්ම පත්‍ර විමසීමේද මෙම තත්ත්වය අපිට හොඳින් දැකගත හැකිය.
curtesy : sithmalyaya.com