මම හරි මහතයි ඩොක්ටර් කෙට්ටු වෙන්න බෙහෙතක් දෙන්න බැරිද?

 දිනක් සායනයට පැමිණි රෝගියෙක් වෛද්‍යවරයාගෙන් ඇසුවේ මෙවැනි ප්‍රශ්නයක්.

ඩොක්ටර්... මගේ ඇඟ කෙට්ටු වෙන්න බෙහෙත් නැද්ද?

ඉතාමත් දුක්බරිත හඬකින් රෝගියා නැගු මේ ප්‍රශ්නය මෙම රෝගියා පමණක් නොවෙයි රෝගින් ගණනාවක්ම වෛද්‍යවරුන්ගෙන් බොහෝවිට අසන ප්‍රශ්නයක් එනිසා,

බර වැඩි වීම හෙවත් තරබාරුකම ගැන (Obesity) අද අපි කතා කරමු.

ශරීරයේ නියමිත බර ප්‍රමාණය කුමක්ද යන්නත් තමන්ගේ බර ඒ අනුව ඇතිද යන්නත් අපි සැමගේම හිතේ තියෙන කුතුහලයක් කිව්වොත් නිවැරදියි. ඇත්තටම ශරීරයේ උස අනුව තමන්ට තිබිය යුතු බර ප්‍රමාණය වෙනස් වෙනවා. ශරීරයේ බර හා උස අනුව තීරණය කරනා අගයක් මත තමන්ගේ බර නියමිත පරිදි ඇතිද යන්න තීරණය කරනු ලබනවා. මෙම අගය BMI (Body Mass Index) ලෙස ඉංගී‍්‍රසි අකුරු තුනකින් හඳුන්වනු ලබනවා. මෙම අගය ගණනය කරනු ලබන්නේ කෙනෙකුගේ බර, තමන්ගේ උස ප්‍රමාණයේ වර්ගයෙන් බෙදීමෙනුයි. (මෙහිදී බර කිලෝ ග්රෑම්වලින්ද උසෙහි වර්ගය උස මීටර්වලින් ගෙන නැවත එම අගයෙන් වැඩි කිරීමෙන් ගත හැකියි.)

බර (Kg)

උස ඔ උස (m2) = BMI

මෙම අගය 19 - 24 අතර නම් නිරෝගී බරක්ද, 24 සිට 29 දක්වා බර වැඩි ගණයටද, 30 ට වැඩි අය අධික තරබාරු ලෙස රෝගී ගණයටද සලකා බැලෙනවා. අගය 19 ට අඩු අය බර අඩු නිරෝගී නොවන කොටසක් ලෙසද සැලකෙන බව මතක තබාගත යුතු වෙනවා.

ශරීරය අධික ලෙස බර වැඩිවීම රෝග ගණනාවකට අත වනනා කරුණක්. හෘද රෝග, දියවැඩියාව, නින්දෙන් ගෙරවීම නිසා හුස්ම ගැනීමට අපහසු වීම, පිළිකා වර්ග හා හන්දි ආබාධ ඒ අතර ප්‍රමුඛ වෙනවා.

ශරීරයේ බර අඩුකර ගැනීම ගැන කතා කරන විට, ශරීරයේ බර වැඩිවන ආකාරය දැනගැනීම වැදගත්.එය ආහාරමය ශක්තිය එකතුවීමත්, ශාරීරික ක්‍රියාකාරකම් හා ව්‍යායාම අඩු වී එම ශක්තිය වැය කිරීම අඩුවීමත්, කලාතුරකින් හෝර්මෝන ආශි‍්‍රත රෝග හා අප ගන්නා ඖෂධ වර්ග නිසාත් ඇතිවන දෙයක්. ආහාර පාලනය හා ශාරීරික ක්‍රියාකාරකම් නිසිලෙස පාලනයත් මීට ප්‍රතිකාරය වෙනවා. ඒ ගැන අපි ටිකක් වැඩිදුර කතා කරමු.

ආහාර පිළිබඳ සාධකය කරුණු කිහිපයක් නිසා සිදුවනවා. අධික ශක්තියක් හා කැලරි ප්‍රමාණයන්ගෙන් යුක්ත, ප්‍රමාණයෙන් කුඩා ආහාරත්, මෑතක සිට අප පුරුදු වී ඇති කොත්තු, චයිනීස්, ෆ්‍රයිඩ් රයිස් වැනි Fast foods ගණයට අයිති ආහාරත් අපට බර වැඩිවීමට උදව් වෙනවා. විශේෂයෙන් පැණි බීම හා කෝලා වර්ගයේ සිසිල් බීම මඟින් ශරීරයට ලැබෙන අධික සීනි ප්‍රමාණයත්, කිරි පැකට්, තේ, කෝපිවලට එකතු කරනා අධික සීනි ප්‍රමාණයත් මේ සඳහා අපි හිතනවාටත් වඩා උදව් වෙනවා.

සමීක්ෂණයකට අනුව ඇමරිකාව වැනි රටක සිසිල් බීම හරහා 25%ටත් වඩා අධික කැලරි ප්‍රමාණයක් ශරීරයට ලැබෙන බව ගණන් බලා තියෙනවා. දැන් අපේ රටේ ඇති සිසිල් බීමට අමතරව, අධික සීනි යොදනා තේ, කෝපි, කිරි පැකට් ආදිය ගැනත් සලකා බලනවිට මෙවැනි අධික කැලරි ප්‍රමාණයක් ලැබෙන බව සිතිය හැකි වෙනවා. ඒ වගේම කුසගින්න නිවා ගැනීම සඳහා අධික ශක්තිය ඇති ආහාර වෙනුවට පලා, එළවළු, පලතුරු ආදිය යොදාගැනිම අඩුවීමත්, එළවළු වර්ග තෝරා ගැනීමේදී කැරට්, වට්ටක්කා, අල, බතල වැනි ශක්තිය අධික ආහාර වර්ග යොදා ගැනීමත් සැලකිය යුතු කාරණා වෙනවා. අතුරුපස ලෙසට ගන්නා චොකලට්, ජෙලි, අයිස් ක්‍රීම් වැනි සීනි අධික ආහාර ප්‍රධාන ආහාර වේලට සමානව ශක්තිය හා කැලරි ලබා දෙනවා.

ඉහත ලබාගත් අධික කැලරි හා ශක්තිය වැය කිරීම අපි විසින් කිසිසේත් සිදු කරන්නේ නැහැ. ගමනාගමනය සඳහා යාන්ත්‍රික වාහන යොදා ගැනීම, ගෘහ උපකරණ මඟින් ගෙදර දොර කුස්සියේ වැඩ අඩුවීම, රූපවාහිනිය බැලීම වැනි එක දිගට ඉඳගෙන සිටිමින් ශක්තිය වැය නොකර සිටීම හා රූපවාහිනිය බලන විට ආහාර අනුභවයට පුරුදු වීමෙන් අධික ආහාර ප්‍රමාණයක් නොදැනීම ශරීරගත වීමත්, ඊට අමතර අධික කය වෙහෙසන රැකියාවලින් ඉවත් වීමත් සැලකිය යුතු කාරණා වෙනවා.

ඉතින් මෙම ලිපියේ විස්තර කළ පරිදි අපගේ ශරීරයේ බර වැඩිවීම අප ශරීරය තුළට ගන්නා ආහාර ප්‍රමාණයත්, ශරීරයෙන් වැය කරනා ශක්තිය ප්‍රමාණයත් අතර වෙනස නිසා සිදුවන දෙයක් බව ඔබට වැටහෙනවා ඇති. එක් එක් අයගේ ශරීර ස්වභාවය අනුව ශරීරය පවත්වාගෙන යාමට අවශ්‍ය කරන ශක්ති ප්‍රමාණයද වෙනස් වන නිසා මේ කරුණු තරමක් සංකීර්ණ එකක් ද වෙනවා. ඉතා සරලව ශරීරයේ බර පාලනයට දියහැකි උපදෙසක් වන්නේ,

තමන්ට දියවැඩියාව නොමැති වූවත්, දියවැඩියා රෝගීන් සඳහා නිර්දේශිත ආහාර වර්ග හැකිතාක් අනුගමනය කිරීමට උත්සාහ කිරීමත්, ව්‍යායාම හා ශාරීරික ක්‍රියා වැඩි කිරීමට නොහැකි නම් දිනකට විනාඩි 40ක් පමණ සතියකට අඩුම වශයෙන් දින 5 -6 වත් වේගයෙන් ඇවිදීම, පිහිනීම වැනි තද වෙහෙසක් නොදැනෙන නමුත් ශක්තිය වැය කරන ක්‍රියාවක නිරතවීමක් යන කරුණු කාරණායි. මෙම කාරණය අනුගමනය කිරීමේදී මාස 6ක් ඇතුළත සැලකිය යුතු බර අඩු කර ගැනීමක් සිදු කරගත හැකි බව විශ්වාසයි.

Wmqgd .ekSu wdfrda.Hd mqj;a m; weiqfrks