iranama
ජීවිතය හා ග්‍රහයෝ
පැරණි ජ්‍යෝතිෂඥයන් බොහෝ විට ග්‍රහයන්ට දේවත්වය ආරූඩ කර තිබේ. රවි දෙවියා බුද දෙවියා යනාදී වශයෙන් බොහෝ ජන්ම පත්‍රවල සටහන්ව තිබේ. විශ්මිත ලෙස ග්‍රහයන් මිනිසාගේ දෛවය මෙහෙයවන ආකාරය අනුව සිතා ඔවුන් එසේ කළා විය හැකිය. අප හුස්‌ම ගන්නා මේ වාතලය තුළ සෑම ග්‍රහයකුට අයත් ශක්ති දහරා පවතී. ගස්‌වැල් මල් ඵල මෙන්ම පුංචිම සතාගේ සිට දැවැන්ත සත්වයා දක්‌වා ජීව විද්‍යාත්මක ක්‍රියාවලිය සකස්‌වීමේදී පරමානුවේ සිට සියලුම ශක්ති ව්‍යqහයන් දක්‌වා විශ්වයේ අස්‌සක්‌ මුල්ලක්‌ නෑර මේ ශක්ති නිරන්තර පවතී. මේග්‍රහ ශක්ති විවිධය. විවිධ අතට පරිවර්තන සහිතව කෝටි ප්‍රකෝටි ගණන් එකිනෙක වෙනස්‌ ගුණාංග උපදවමින් ක්‍රියාත්මක වෙයි. ලෝක ගෝලයේ කැරකීමත් සූර්යාගේත් සියලු ග්‍රහ ලෝකවලත් භ්‍රමණය වීම අනුව මෙම තත්ත්වයන් ඇති වේ. මේ වෙනස්‌ වීමේ ස්‌වභාවය තප්පර 30 විනාඩි 01 වැනි අල්ප අවස්‌ථාවලදී පවා ක්‍රියාත්මක වෙයි.
උදාහරණයක්‌ ගත හොත් විනාඩියක දෙකක වෙනසක්‌ සහිතව උපන් නිවුන් දරුවන්ගේ ගතිගුණ අතර යම් යම් වෙනස්‌ කම් පවතින්නේ ඒ ග්‍රහ තාරකාවන්ගේ සුලු මොහොතේ පවා ඇතිවන වෙනස්‌කම් අනුවය. එකම පවුලේ එකම මව්පියන්ට දාව උපදින දරුවන් අතරද මානසික තත්ත්වයන් වෙනස්‌ ආකාරයෙන් පිහිටීමද එවැන්නකි. ග්‍රහයන්ගේ කිරණ දහරාවන්ගේ සූක්‍ෂම කොටස්‌ මානසික තත්ත්වයන්ට බලපෑම් කරයි. මෙහිදී දරුවකු උපදින අවස්‌ථාව ඉතාම විශේෂ අවස්‌ථාවක්‌ වෙයි. මනෝ සංකීර්ණතාව පිහිටීම ව්‍යාප්තිය ශක්‌තිමත් බව මේ ග්‍රහ කිරණ මත පදනම් වෙයි. මව් කුස තුළ දරුවකු වැඩෙමින් ජීවත්වන්නේ වෙනම ලෝකයකය. එනම් මවගේ ශරීරය නමැති ලෝකය තුළය. මවගේ මනසම මුල් කොට ඔහුගේ මනසට පදනම වැටේ. ඔහුගේ සිරුර වැඩෙන්නේ මව ගන්නා ආහාරයෙන්මය. ඔහුගේ ලෝකය වූ මව් සිරුරින් බාහිර පිහිටි මේ ලෝකයේ සියලු සංවේදිතා ඔහු ලබන්නේ මවගේ ඇස කණ නාසය දිව ශරීරය මනස යන ෂඩායතන මගිනි. එතෙක්‌ මෙම ග්‍රහ කිරණ දරුවාට සෘජු සම්බන්ධතාවක්‌ පවත්වන්නේ නැත. එතෙක්‌ සිදුවන සියල්ලක්‌ම මව හරහාම සිදුවෙයි. දරුවා මව් කුසින් බිහිවන අවස්‌ථාව ඔහු ආධ්‍යාත්මික වශයෙන් ජීවය ලබන අවස්‌ථාව වෙයි. මෙය මිනිස්‌ ජීවිතයේ ඉතාමත් සුවිශේෂී අවස්‌ථාවකි. එය ප්‍රකාශ කිරීමට මත්තෙන් තවත් ඉතා වැදගත් දෙයක්‌ පැවසිය යුතුව තිබේ. දරුවා මව්කුසින් බිහිවූ වේලාව සටහන් කර එම වේලාවට අනුව ඔහුගේ ජන්ම පත්‍රය සාදනු ලබයි. මේ උපදින අවස්‌ථාව ඉතා සූක්‍ෂම විය යුතුය. කවුරුත් දැනගත යුතු දෙය වන්නේ මව් කුසින් දරුවාගේ හිසට බාහිර වාතය ගැටෙන මුල්ම අවස්‌ථාව උපන් වේලාව විය යුතු බවය. මුළුමණින් බිහිවීමෙන් අනතුරුව සටහන් කර ගන්නා වේලාවටද එකම ලග්නය පැවතුනත් නිවුන් දරුවන් දෙදෙනෙක්‌ අතර මානසික සංකීර්ණතාවයේ යම් අන්දමක හෝ යම් වෙනසක්‌ ඇති වෙන්නාසේම එයින්ද එවැනි වෙනස්‌කමක්‌ ඇතිවිය හැකිය.
මේ ඇසිල්ලක වෙනස සමස්‌ථ ජීවිතයටම බලපාන බව සිතන්න. සැත්කමක්‌ මගින් බිහිකර ගන්නා දරුවාටද එයම නියමය වෙයි. සැත්කම් කැපුම දරු ගැබ දක්‌වා ආවරණය වූ අවස්‌ථාව නිවැරදි වේලාව විය යුතුය. මෙලෙසට වේලාව ගණනය විය යුත්තේ ඇයි? මව් කුස තුළ සිටි බිළිදා බාහිර ලෝකයට අවතීර්ණ නොවුන නිසා ග්‍රහයන්ගේ කිරණ ජාලයට ඔහු හසුවී නැත. මවු සිරුරින් හිස අවට වාතයට යාන්තම් හසුවන විටම ග්‍රහයන්ගේ කිරණ ජාලයට ඔහු සම්බන්ධවීම සිදුවෙයි. ඒ කිරණ කුමන අන්දමින් සම්බන්ධ වූයේ දැයි ජ්‍යෝතිෂඥයා කේන්ද්‍රය සාදා දක්‌වයි. අප ජීවත් වන පෘථිවිය තමා වටා කරකැවෙමින් තිබේ. දරුවා උපදින අවස්‌ථාවට සූර්යා සිටියේ කුමන දිසාවේද එකී දිසාවට මේ කැරකැවෙන පෘථිවියේ කුමන පැත්ත කුමන වූ තරුපොකුරකට මුහුණදී සිටියේද යන්න ලග්න රාශිය තුළින් ප්‍රකාශ වෙයි. ඒ අනුව විශ්වයේ උතුර ඊසාන නැගෙනහිර ගිනිකොණ දකුණ නිරිත බටහිර වයඹ වශයෙන් කොටු දොළහ සකස්‌වී එම ග්‍රහයන් විශ්වයේ සිට කිරණ එල්ල කළ ආකාරය දැක්‌වෙයි.
මේ කිරණ වල ක්‍රියාකාරිත්වය සකස්‌ වන්නේ තම දරුවා මව් කුස තුළ දසමාසයක්‌ තබාගෙන මනස සකස්‌කර තිබූ ආකාරයට අනුවය. මේ වර්තමාන විපරීත ලෝකයේ සංස්‌කෘතිය සභ්‍යත්වය පාගාගෙන කෘතිම වූ ආධ්‍යාත්ම ගොඩනගමින් සැප සම්පත් කෙරේ අධික වූ තෘෂ්ණාව වෛර ක්‍රෝධ ආදී තත්ත්වයන්ටම මව මුහුණදීම වැඩි වශයෙන් කළේ නම් කිසිදු හරයක්‌ නැති පහත් පෙළේ මානසික තත්ත්වයන් උද්දීපනය කරන පොත පත නාට්‍ය වැනි දේවල් ආශාවන් රසවින්දේ නම් හොර බොරු වංචා කපටිකම් වලට සිත ඇදුනේ නම් දරුවාගේ මානසික තත්ත්වය කනගාටුදායක විය හැක. ඒ කෙසේද යත්. මවගේ සිතුම් පැතුම් එලෙස තත්ත්වයෙන් පවතින විට තම කුස තුළ වැඩෙන දරුවාගේ මනසද ඊට සමානව ගොඩනැගෙන්නේය. ඔහුගේ මොළයේ නියුරෝණ ස්‌ථාන ගතවන්නේ එම තත්ත්වයට අනුවය. ශාස්‌ත්‍රීය පොත පත විද්‍යාත්මක පතපොත කියවීම මෙන්ම සාරවත් යහපත් දේවල් දැකීම අනුචිත ආහාර පාන නොගෙන ගුණාත්මක ආහාර පාන ගැනීම ආදී ලෙස යහපත් පැවැත්මක සිටීම භාවනා ආදියේ යෙදීම ආදී ක්‍රියාවල නියුතු වූවා නම් දරුවාගේ මොළයේ නියුරෝණ ස්‌ථාන ගතවන්නේ එයට අනුකූලවය. උපතත් සමග ග්‍රහයන්ගේ කිරණ ශක්ති සම්බන්ධ වන්නේ එකී මනෝ විඤ්ඤාණයට ඉහතකී පරිදි සකස්‌ වූ නියුරෝණ කරා මෙම ග්‍රහකිරණ සම්බන්ධවී එම දරුවාගේ සමස්‌ථ ජීවිතය සඳහා ක්‍රියාකාරී වෙයි. මිනිසකු ගේ සිතුවිලි ආකල්ප හැඟීම් ඒ අනුව ඉදිරියට සකස්‌ වීම සිදුවෙයි. උපතට අනුව සකස්‌වන ජන්ම පත්‍රයෙන් මේ ග්‍රහයන්ගේ සංකීර්ණ කිරණ රටාව දිස්‌වෙයි. විශ්වයේ ප්‍රධාන ග්‍රහයා වූ රවිගේ පිහිටීමට අනුව ඔහුගේ පෞරුෂ බලය සකස්‌ වෙයි. දහවල් දොළහ පමණ කාලයේ උපන් කෙනෙකුගේ රවි සිටින්නේ කේන්ද්‍රයේ 10 වන භාවය තුළය. 10 වැන්න වූ කලී කෙනෙකුගේ ජීවන නෞකාව ගෙන යන එන්ජිම බඳුය. එනම් එය ජීවිතය පද වන ඔහුගේ පෞරුෂය රැකියාව පිළිබඳ ප්‍රකාශ කරන ග්‍රහ කිරණයයි. අනෙකුත් ග්‍රහයන්ගේ කිරණද ඔහුට සම්බන්ධවී ඇති ආකාරය අනුව ඔහු ලබන තත්ත්වයේ උසස්‌ පහත් බව ලැබෙයි. අපි මිනිසකු තුළින් සංකීර්ණ ගුණාංග රැසක් දකිමු. ඇතැම් අය තුළ හොඳ ගුණාංග වලට නරක ගුණාංග වැඩි ලෙස මිශ්‍රව පවතී.
උදාහරණයක්‌ ගතහොත් කෙනෙක්‌ යමෙකුට ඉතා ප්‍රශංසනීයව උදව් කරයි. ඔහුම තව කෙනෙකුට වෛර කරයි. ඇතැම් විට ආකෘතඥ ස්‌වභාවයෙන් වැඩි ලෙස සිටී. එබැවින් කොටසකට ඔහු හොඳ කෙනෙක්‌ ලෙසටත් කොටසකට නරක කෙනෙක්‌ ලෙසටත් පෙනේ. කෙනෙකුගේ කුසලා කුසල තත්ත්වයන් අනුව උපත සිදුවන බව අපි දනිමු. එසේම හැම කෙනකුටම පිං විතරක්‌ නැත. පව්ද තිබේ. ඇතැම් අයට පිං වැඩිය. බොහෝ අයට පව් වැඩිය. එසේ පිං පව් දෙකට අනුවම උපත ලබන්නට ඊට අදාළව මව් කුසක්‌ ලැබේ. මවගේ මනස හරහා ඔහුගේ මොළයේ නියුරෝණ සකස්‌වීම සිදුවන්නේද ඒ පින හා පවට අනුකූලවය. උපදින අවස්‌ථාවේ හිස මේ බාහිර ලෝකයේ වා තලයට මුසුවනවාත් සමග ග්‍රහයන්ගේ කිරණ සම්බන්ධවන අතර එම දරුවාගේ මොළයේ නියුරෝණ ශක්ති ස්‌ථාන ගතවූ අන්දමට මෙම ග්‍රහ කිරණ මගින් පව හෝ පින දෙකට අනුකූලව මෙලොව ක්‍රියාත්මක තත්ත්වය ඇති කරයි.
ග්‍රහයන් ඉහළ අභ්‍යවකාශයේ බ්‍රමණය වෙමින් අපට නොපෙනුනත් අප හුස්‌ම ගන්නා අප සිරුරට ස්‌පර්ශව පවත්නා මේ වාතලය තුළ ඔවුන්ගේ කිරණ හෙවත් විශ්ව බලය පවතී. ඔවුන් අප උපදින අවස්‌ථාවේ අපට සම්බන්ධව සිටි ආකාරයට අනුව ඔවුන්ගෙන් සිදුවන ග්‍රහමාරුවීම් නමැති ගමන අනුව අපගේ පව හෝ පින ක්‍රියාත්මක වෙයි. සිතුම් පැතුම් ඉටු නොවීම හෝ ඒවා අමාරුවෙන් බාධක අවහිර මැදින් ඉටුවීම පව අනුව සිදුවේ. ඒවා නිසි ලෙස අවහිර බාධක නොවී ඉටුවීම පින අනුව සිදුවේ. එනිසා විශ්වයේ ප්‍රධාන මුදල් ඒකකය වන්නේ පින ඉපදවීම මිස රුපියල් ඩොලර් පවුම් නොවේ. ග්‍රහයන් හැමවිටම අපේ ජීවිතය මිස අන්යමක්‌ද නොවේ.
courtesy : sithmalyaya.com
