සාදයක දී කැපී පෙනෙන චරිතයක් වෙන්න කොයි කවුරුත් කැමැතියි. එහිදී වඩාත්
වැදගත් වන්නේ පෙනුමයි. කොතරම් හොඳින් ඇන්දත් හෙයාස්ටයිල් එක ඇඳුමට, ඔබේ
පෙනුමට ගැළපෙන්නේ නැතිනම් සුන්දර පෙනුමක් නොලැබී යාවි.
මෙම කොණ්ඩා මෝස්තරය වඩාත් ගැළපෙන්නේ තරුණ වියේ සිටින, විලාසිතා අගයන
කෙළිලොල් යුවතියකට යි. තරමක කෙටි කෙස් කලඹක් ඇති යුවතියකට වුවත් මේ කොණ්ඩා
මෝස්තරය ඉතාමත් පහසුවෙන් දැමීමට පුළුවන්.
පළමුව ඉදිරිපසින් කොණ්ඩය පැත්තට පීරා කෙස් කොටසක් ඉතිරි වන සේ අනෙක්
කෙස්වලින් කොටසක් බැක්කෝම්බ් කරන්න. එම බැක්කෝම්බ් කළ කෙස් වැසෙන සේ
ඡායාරූපයේ පෙනෙන පරිදි එම කෙස් පීරා පසුපස පැත්තකට ගෙන කොණ්ඩා කටුවලින්
රඳවන්න.
ඉන්පසුව අනෙක් පැත්තේ කොණ්ඩය ලිහිල්ව කරකවා (අඹරවා) හිස පිටුපසට ගෙන
කොණ්ඩා කටුවලින් රඳවා ගන්න. දැන් පසුපස ඇති කෙස් කොටස් ද ඉහත ආකාරයට
ලිහිල්ව අඹරවමින් කොණ්ඩා කටුවක අධාරයෙන් රඳවන්න.
ඉදිරිපසින් පැත්තට පීරා ඉතිරි කළ හිසකෙස් කොටස බම්ප් එකක් ආකාරයට සකසා හෝ විහිදී යන අයුරින් අතින් සකසා කොණ්ඩා කටුවලින් රඳවන්න.
ඉන්පසුව පසු පසින් ඉතිරි වී ඇති කෙස් කොටස් කලින් හිසකෙස් රඳවා ගත් තැනට ම සම්බන්ධ වන සේ රඳවන්න.
අවසානයේ දී ඇඳුමට ගැළපෙන වර්ණයකින් මලක් හෝ හිස සැරසිල්ලක් රඳවා ගැනීමෙන් වඩාත් අලංකාර කොණ්ඩා මෝස්තරයක් සකසාගත හැකියි.
ගවුමකට, සාරියකට, සල්වාර් විලාසිතාවකට වුවද මෙම කොණ්ඩා මෝස්තරය ගැළපෙන
අතර ඔබ එය අලංකාර කිරීමට රඳවන සැරසිල්ල අනුව තවත් සුන්දර කරගත හැකියි.
