ශ්‍රී ලාංකීය අපට ආහාර පිසීමේදී කරපිංචා යනු නැතිවම බැරි ස්වාභාවික රසකාරකයකි. කරපිංචා ආහාරයට ගන්නේ ශ්‍රී ලාංකිකයන් පමණක් නොවේ. එය, ඉන්දියාව ඇතුළු ඇතැම් ආසියාතික රටවල ද රසකාරකයක් ලෙස බහුලව භාවිතා වේ. බොහෝවිට, කරපිංචා පමණක් ආහාරයක් ලෙස පිසීම දක්නට නොලැබෙන අතර, ආහාර පිසීමේදී අනෙකුත් ස්වාභාවික රසකාරක සමඟ මිශ්‍රව භාවිතා කරනු දැකිය හැකිය. කෙසේ වුවත්, ඇතැම් අය කරපිංචා කැඳ වැනි ආහාර පිළියෙල කරනු දක්නට ලැබේ.
ඔක්සිකාරක ආතති අධ්‍යයනය
(Oxidative stress study)
2007 වසරේදී රසායන-ජෛව අන්තර්ක්‍රියා (Chemico-Biological Interactions) සඟරාවේ පළ වූ සත්ත්වයන් යොදාගෙන සිදුකළ පර්යේෂණයක ප්‍රතිඵල අනුව කරපිංචා පත්‍රවල යුෂ ඔක්සිකාර ආතතිය (Oxidative stress) අඩුකරන බව සොයාගෙන ඇත. මේ ක්‍රියාවලිය විශේෂයෙන්ම අග්න්‍යාශය හෙවත් ඇලදිව (Pancreas) තුළ සිදුවන බව සොයාගෙන ඇත. සැබැවින්ම, ඔක්සිකාර ආතතිය වැඩි අගයක් ගැනීම සන්ධි ප්‍රදාහ (Arthritis), කොලෙස්ටරෝල් තැන්පත් වී රුධිර නාල සිහින් වීමේ රෝගය (Atherosclerosis), සහ දියවැඩියාව ඇති බවට ඉඟියක් ලෙස දැක්විය හැකිය.
එමෙන්ම, කරපිංචා පත්‍රවල යුෂ නිතිපතා ආහාරයට ගැනීමෙන්, දියවැඩියාව වැලඳුනු මීයන්ගේ අග්න්‍යාශය තුළ ඔක්සිකාර ආතතිය ඇතිවීම වැළකෙන බවද, ඔක්සිකාර ආතතිය නිසා සිදුවන පටක හානි සුවවන බවද එම පර්යේෂණය මඟින් පෙන්වා දී ඇත. සැබැවින්ම, කරපිංචා පත්‍රවල යුෂවල ක්‍රියාකාරීත්වය, දියවැඩියාව පාලනය කිරීම සඳහා නිර්දේශ කරන ග්ලිබෙන්ක්ලමයිඩ් (Glibenclamide) ඖෂධයේ ක්‍රියාකාරීත්වයට තරමක් සමාන වන බව එම පර්යේෂණය මඟින් පෙන්වා දී ඇත. කෙසේ වුවත්, පර්යේෂකයන් පවසන්නේ මිනිසුන් යොදාගෙන වැඩිදුර අධ්‍යයනයන් කිරීමට අවශ්‍ය වන බවයි.
පිළිකා වැළැක්වීමට ඇති හැකියාව
(Potential Anti-Carcinogen)
2000 වසරේදී මානව පෝෂණය උදෙසා ශාකමය ආහාර (Plant Foods For Human Nutrition) සඟරාවේ පළ වූ අධ්‍යයනයකට අනුව, කරපිංචා පත්‍රවල ස්වාභාවිකවම ප්‍රතිඔක්සිකාරක (Antioxidants) බහුලව ඇත. මුක්ත ඛණ්ඩක (Free radicals) හෝ වෙනත් විෂ සහිත රසායන ද්‍රව්‍ය (Toxins) වලට නිරාවරණය වීම නිසා සිදුවන හානිවලින් සහ මරණයට පත්වීමෙන් සිරුරේ සෛල ආරක්ෂා කිරීමට මෙම ප්‍රතිඔක්සිකාරකවලට හැකියාව ඇත. සත්ත්වයන් යොදාගෙන සිදුකළ එම පර්යේෂණයේදී ඩයිමෙතිල්හයිඩ්‍රසීන් හයිඩ්‍රොක්ලෝරයිඩ් (Dimethylhydrazine hydrochloride) නම්වූ පිළිකා කාරක (Carcinogen) රසායන ද්‍රව්‍යය මඟින් සිදුවන අහිතකර සෞඛ්‍ය ප්‍රතිඵල අඩුකිරීමට කරපිංචා යුෂවලට හැකියාව ඇති බව සොයාගෙන ඇත. කෙසේ වෙතත්, මිනිසුන් තුළ සහ අනෙකුත් පිළිකා කාරක කෙරෙහි කරපිංචා යුෂවල ක්‍රියාකාරීත්වය තවදුරටත් පර්යේෂණයට ලක් කළ යුතු බව පර්යේෂකයන්ගේ අදහසයි.
ප්‍රති-ප්‍රදාහමය වාසි
(Anti-Inflammatory Benefits)
2009 වසරේදී ඖෂධ විද්‍යා සහ පර්යේෂණ සඟරාවේ (Journal of Pharmaceutical Sciences and Research) පළ වූ පර්යේෂණයකට අනුව කරපිංචා පත්‍ර වල, ප්‍රබල ප්‍රති-ප්‍රදාහ ගුණාංග එනම්, ප්‍රදාහයන් සමනය කිරීමේ ගුණාංග ඇති බව පෙන්වා දී ඇත. මේ පර්යේෂණයේදී, පිළිකා වැලඳුණු මීයන්ගේ ප්‍රදාහයන් නිසා සිරුර ඉදිමීම සැලකිය යුතු ලෙස අඩුකිරීමට කරපිංචා යුෂ වලට හැකි බව තහවුරු විය. එමෙන්ම, කරපිංචා යුෂ මගින් සිරුරේ ඇති ගැටිති හා ගෙඩි (Tumors) වල සංඛ්‍යාව, ඒවායේ ප්‍රමාණය හා බර විශාල වශයෙන් අඩුකරන බව පෙන්වා දී ඇත. මේ පර්යේෂණය දින 16 ක් තිස්සේ කරන ලද අතර, මිනිසුන් යොදාගෙන තවදුරටත් පර්යේෂණ කිරීම අවශ්‍ය බව පර්යේෂකයන්ගේ අදහසයි.
පෝෂ්‍ය පදාර්ථ
කරපිංචා පත්‍ර වල විටමින් B වර්ග සහ විටමින් A ඇතුළු විටමින් සහ ඛණිජ ලවණ වර්ග සුළු ප්‍රමාණ වලින් අඩංගු වේ.
එමෙන්ම, එය ප්‍රෝටීන්, ඇමිනෝ අම්ල (Amino acids), සහ ඇල්කලොයිඩ (Alkaloids) නැමැති පෝෂ්‍ය පදාර්ථ සහිත ආහාර ප්‍රභවයකි. එහෙත් ආහාර පිසීමේදී කරපිංචා භාවිතා කරන්නේ සුළු වශයෙන් බැවින්, කරපිංචා මගින් ලැබෙන පෝෂණ ගුණය ස්වල්ප විය හැකිය.
