කෑම කන්න සුදුසුම වේලාව ගැන ඔබ දන්නාවාද?

අපේ ගොඩක් අයට කෑම කන්න වෙලාව හදාගන්න බොහොම අමාරුයි. වෙලාවට කෑම කන්නෙ නැති එකේ ආදීනව ගැන ‍දොස්තර මහත්තුරු කොයි තරම් අවවාද දුන්නත් ගොඩක් අයට ඒවා නිකන් බීරි අලින්ට වීණා වයනවා වගේ. ඒක එහෙම වුණත් අපි කන්න ඕනෙ වෙලාව ගැන ~ටයිම්ස්~ සඟරාව බොහොම අපූරු කතාවක් කියලා තියෙනවා.

ඒ අය කියන විදියට නම් උදේ කෑම කන්න කියලා කියන්නෙ උදේ නැඟිටලා පැය භාගයක් ඇතුළතයි. ඒ කියන්නේ උදේ දහයට නැඟිටලා 10.30ට කලින් කෑම කන එක නෙවෙයි. අඩුම තරමෙ උදේ 6.30ට වත් නැඟිටලා 7 වෙන්න කලින් උදේ කෑම කන එක ගැනයි. ඒ වගේම පුළුවන් තරම් ප්‍රෝටීන් සපිරි ආහාර උදේ කෑම වේලට එකතු කර ගන්න කියලත් ඔවුන් කියනවා.

දහවල් ආහාරය ගැන කියන්නේ මේ වගේ දෙයක්. දහවල් ආහාරය ගන්න හොඳම වෙලාව තමයි දහවල් 12.45. ඒ කියන්නේ උදේ ආහාරයෙන් පැය හතරකට පස්සෙ තමයි දහවල් ආහාරය ගන්න කියලා කියන්නෙ. ඒ වගේම දහවල් ආහාරයෙන් පැය භාගයක්වත් යනතුරු අසුන් ගැනීමෙන් වළකිනවා නම් හොඳයි කියලත් ඔවුන් කියනවා.
රාත්‍රි ආහාරය ගන්න හොඳම වෙලාව තමයි රාත්‍රි 7.00. ඒ වගේම රාත්‍රි ආහාරය සහ නින්දට යෑම අතර පැය තුනකවත් පරතරයක් තියෙන්න ඕනෙ. රාත්‍රි ආහාරය ලබා ගත්ත ගමන් නින්දට යෑම ලෙඩ රෝග ගණනාවකට හේතු වෙන්න පුළුවන් කියලා ඔවුන් කියනවා. ඒ වගේම හොඳ නින්දක් ලබා ගන්න නම් අඩුම තරමින් රාත්‍රි ආහාරයෙන් පසු පැය තුනක් විතර විවේකීව ඉන්නත් ඕනෙ.

curtesy : sinhalalipi.com